So, jedzd had also die indernadzionale Finanzkrise ach den Kissinger Landkreis mid voller Wuchd erwischd.

Der Aldbabierbreis is im Keller! Na subber! Was wor des nuch damols bei Einführung vo die blaue Donne für e Goldgräberschdimmung bei Schdadd und Landkreis: „Jedzd wird des große Geld verdiend!“

Du hasd damals gedachd, die Rede ned vo Aldbabier, sondern vo Akdzie. Und so wies ausschaud, hömm se dabei an Lehmann-Akdzie gedachd. Möchd ned wiss, wieviel vo dere Lehmann-Dinger in die ledzde Zeid ah scho in die blaue Donne geleche worn.

Gud, dadurch hadde se dann wenichsdens widder eweng en Werd! Zwor nur den Aldbabierwerd, abber immerhin! Wobei ich ja ehrlicherweis ned verschdeh, dass die Finanzkrise überhaubd Auswirkunge auf den Aldbabierbreis had. Had doch sunsd ah niemand indressierd!

Und bidde, es wird doch weiderhie Babier gebrauchd! Zum Beischbiel für des ganze Geld, also die Milliarde, die eurobbaweid in Banken und sonst wo hie gebudderd wern.

Des könnd mer doch locker aus Aldbabier mach! Abber, ich hör jedzd besser auf!