E Schlidzohr isser ja scho, unner Kurdireggdor, der Sauers Gunther!

Hadder sich doch einfach emol in Bad Homburg als Kurdireggdor beworbe.

Einfach nur so aus Schbass, söchder.

Ja, ja, nur aus Schbass! Wers glebbd wird selich!

Is doch scho merkwürdich, dasser sich in Bad Homburg bewirbd, weniche Woche nachdem in Kissinge über sein Bosde als Kissinger Kurdireggdor diskudierd wurn is.

Angeblich wolld er den Dschob in Bad Homburg nämlich gor ned, denn er fühld sich in Kissinge wohl. Er wolld eichendlich nur emol sein Markdwerd ausdesd.

Und söll ich was soch, des nehm ich unnern Kur-Gunther zugor ab.

Abber, dass er ned demid gerechend had, dass des Ganze öffendlich wird, des kanner meinedweche dem Höörder Bforr erzähl.

Denn es konnd ihm doch eichendlich nix Besseres bassier.

Jedzd wess doch jeder in Kissinge, der Gunther Sauer is e Schbidzen-Mann, der könnd zugor Kurdireggdor vo Bad Homburg wer und machds ned!

Gschickd gemachd, denn fürs Erschde dürfds über die Schdelle vom Kissinger Kurdireggdor kee Diskussione mehr geb. Wenichsdens für heuer! Abber, ich hör jedzd besser auf!