Der CSU sin in Bad Bocklet 25 Wahlblakade abhande kumme, odder soche mers auf gud deudsch: „Sie sin geklaud wurn!“ Also mer frächd sich ja scho, wer diese Holzdäfelich brauch kann und vor allen Dingen für was? Schdehn da jedzd in irchend em Wohnzimmer 25 Aufschdeller mid dem Kiesels Robert, der Renners Karin oder dem Becksteins Günther? Gud, mer wess ja ned welche Köbf auf dene geklaude Blakade worn. Vielleichd wors ja ah 25mol der Beckstein.

Wenn ja, dann würd ich auf fränkische Devodzionalienjächer als Däder dibb. Ja bidde, dem Franke Beckstein sei ledzdes Wahlblakad, sowas had schließlich ned jeder. Vielleichd hömm sich e boor Leud zugor mid dem Beckstein-Blakad so en klenne Abschiedsaldar in ihr Karahsch gebaud, demid se bersönlich vom Günther Abschied nehm könne.

Gud, die CSU had zwor in Franken einiche Günther-Großblakade noch schdeh gelösse, anscheinend demid sich die Leud in die Kondulenzlisde eidrach könne, abber des langd dem Enne odder dem Annere hald doch ned. Nur komisch, dass ledichlich CSU-Wahlblakade verschwunde sin, kee Enzichs vo die Grüne odder vo die SPD. Naja, ehrlich gsachd, den Maget würd ich mer jedzd ah ned unbedingd ins Wohnzimmer schdell.

Vielleichd sin abber ah deshalb nur CSU-Blakade verschwunne, weil se ganz einfach aus besserem Holz worn. Ja, wenn du die Wahl hasd zwische Massiv-Holz odder Bressschbahn, dann nimmsde doch klor des Massiv-Holz. Vor allen Dingen wenn de dadraus en Hoseschdoll bau willsd. Schließlich söll so e Hoseschdoll ja ach eweng hald und ned gleich bei die erschde ruckardiche Bewechung vo so em Rammler widder ausernannerfall.

Abber ich hör jedzd besser auf!