Langsam würrds eng!, hodd der Gotthold gemeent, wie er gelassd hodd, däss n vergangene Oktober der Siebenmilliardsd Mensch off die Welt geburrn wurrn iss. Muss een scho bedenklich stimm. Domols in die Schul hömm mir schließlich noch vo nerr bloß dreieinhalb Milliarde g'höört. Owwer stimmt doss wallich, dässes langsam eng würrd? Ich hobb mich widder amoll hiegsetzt unn eene vo mei brühmt-berüchtigte Rechnunge oogestellt.

Üüwerleecht hobb ich, wie viel Platz wohl gebraucht würrd, ömm alle sieben Milliarde Erdenbürger amoll bei uns do zomm of een Haufe zu stelle. Schätzt amoll, woss doss für a Fläche wäär. Ganz Deutschland? Ganz Europa? Amoll obgsänn vo alle logistische Schwierigkeite (schließlich müsste die sieben Milliarde, wenn sa alle of een Haufe stänn, jo aach a woss ess und do würrds selbst oowen Kreuzberg eng!) bin ich davoo ausgange, däss jeder zwee Quadratmeter Platz hodd. Im Vergleich zu n Kreuzberg oo n Sonndich, wenn die Sonn scheint, iss doss fei goornedd so wenig! Also zwee Quadratmeter für jeden Weiße, Schworrze, Asiaten, Australier, Ginolfser, Sternberger etcetera bb.

S Land Bayern hodd ungfähr 71 000 Quadratkilometer, woss laut Adam Riese 71 Milliarden Quadratmeter senn. Für alle sieben Milliarden Leut vo die Welt werrn bei zwee Quadratmeter für jeden owwer nerr bloß 14 Milliarden Quadratmeter notwendich. Stellt merr also alle sieben Milliarden zomm off een Haufe unn gidd jeden zwee Quadratmeter Platz, langed grood amoll a Fünftel vo Bayern, also ungfähr Unter- mit Oberfranken, unn alle hädde Platz! Söllt merr nedd für mööchlich halt, odder?

Gut, a bessla mehr müsst merr scho eikalkulier, weil schließlich well merr jo kee Leut nei n Burgwallbicher See stell unn a schmooler Zugang nauf zunn Kreuzberg müsset aach frei blei, däss mir n Sonndich zu a Brotzeit nauf komme. Off die anner Seite dääd ich vuurschloo, däss mir o dann Dooch großzüüchicherweis amoll dehemm bleiwe, so däss die Japaner, Chinese, Kanadier, Inder unn alle annere aach amol off unnern heiliche Berg könnte unn sich a Mooß Bier unn a Kreuzbergplatte läss gschmeck könnde.

Owwer Spaß beiseite: merr sidd, oo n Platz scheitert unner Welt nedd, nur midd die Esserei, doo würrds halt leider Gottes ömmer enger. Drömm abbelier ich oo euch: seid euch doss ömmer widder bewusst, spend, wosses Zeuch hält und denkt droo, wie guut's uns vergleichsweis ömmer noch gädd. Servus, der Eustach.