Die Glosse: Drei Könich im Ulmer Münster

So, jetz hats aach die heiliche Drei Könich voll erwöscht. Ausgerächert im Ulmer Münster soll dr rassistische Melchior e für allemoal aüs es Krippele in die Flucht geschloche wern. Zugawe, der Borsch sieht scho e weng arch verschammerierd (verunstaltet) aüs. Vielleichd liechds ower aach am Alter, schließlich isser scho angeblich rund hunnerd Johr alt.

Ower nu? Alle drei sölle jetz pensioniert wern. Sie wärn schließlich e Zumutung für jeden Betrachter. Werd jedenfalls behaupt. Ersatz? Bis jetz Fehlanzeiche. Debei gidds landauf on landab so ville guete Beispille, wen mer do in des Ulmer Münsterkrippele neistell könnt.

Ich prowiers. Do wern die drei bayrische Prinzrechente vo Berlin, där Horst, där Alex (Dobrindt) on dr Andi. Och Herrje, den Pannen-Andi konn mer doch ned offs Christkinnele loes geläss, odr? Des lachd sich off sei Stohmatratze jo glatt kaputt.

Des roete Dreigestirn, där Walter-Norbert, die Saskia on dr Olaf? Au weh. Wu käme mer dann hie, wann mer jetz die Dreikönich aach noch feminisiern. Dass do noch kenner drauf komme is, dass mer do jetzer aach e Quote eiführ müsst? Geschenkt.

Wie wärsch dann mit e so e richdich Koalition? Dr Anton vo die Grünne, dr Christian vo die Liberale on dr Alexander (Gauland) vo die AfD?  Aüsgeschlosse, dr heilich Josef griechet gleich so en Schreck, wann här die drei zu Gesicht gricht, dass här Hals üwer Kopf mid sei Christkinnele freiwillich nooch Ägypten aüswandert.

Ich hobs. Onner Markus, onner fränkisch-bayerischer Corona-Könich is die einzich Alternative. Do brauchts kee drei, dr Markus zieht ei in des Ulmer Münster als die allerheilichste Könichs-Dreifaltichkeit, Kaspar, Melchior on Balthasar in einer Person. On här tröcht zusätzlich zegor senn eichene Stern selwer für sich här. On alle Engel on Erzengel on alle Cherubim on Serafim vo Oberammergau im Süden bis Pinz im Norden, vo Bitburg im Westen on bis Schwedt im Osten jubeln ihm mid des schüe Dreikönichsliedle zu: „ Freut euch alle sehr, wenn ich Morgen land“. Dr Jubel on die Frööd wär eefoch gor ned auszuhalle, zegor „in Ulm und um Ulm und um Ulm herum“.

Ned auszudenke!