Zur Erinnerung: Vur 25 Johr
veröffentlicht unter „Bos määnt denn Ihr dozu...?":
Wos hot sich doch in zwee Woche alles verennert! – E poor Johr senn off die poor Woche zommgeknöert worrn, däß mer gor net wäß, wu mer ofang söll! Nie in mein ganze Lawe hätt ich mir läss trääm, däß ich scho Trabi gfohrn bin und mir die Leut zugewunke hömm, wie wenn der Bischof kommet, däß ich jetzt wääß, wos e Kombinat odder e Betriebskampftruppe is, und däß mir off die Landkorte in die DDR üwerhaupt net existiern – mir senn äfoch groegschtechelt neigezächelt.
Alle alte Atlanten hömmer zommgekratzt, däß die Trabilich aach wösse, wu se hiefohr müsse, wenn se net bloß Mellerscht odder Neuscht kennelarn welle und die Wasserkuppe, die se vo düwe ömmer ogeguckt hömm, aach finne.
Üwerol säehste frömme Gsichter. Du kennst dich nix mer aus - und wennde schnell emol mit dei älter Mäntele fortschpringst und bloß Banane nei dei Wöchele leechst, musste domit recher, däß dir änner e Gschenk möcht.
Es git off ämol einen Haufe guete Mönsche und endlich könne mer unner Nächstenliebe o en Mann gebring und so richtich losgeläss! Mir könne uns off die Schtroeß gschtell mit e Kaffeekanne - könne Kuche und Brotzeit vertääl, könne Leut mit hämmgschläff, die sich noch richtich gfröh könne und Better gericht. Und jeder wu ewing e Hazz hot, hot scho emol müss flenn. - E Genshaut - nä aach e richtiche Wut off die Parteibonze vo düwe gricht mer und mer könntse fast derwörch! Jeder hot scho sein äächene DDR?ler, dann mer bestimmt emol besücht und sei äächene DDR-Schtorri, die mer ömmerzu und üwerol verzehl konn und die ömmer länger werd...
Alles hot sich verennert und net bloß dos Gemösch vo die Trabischtinkerlich hot sich nunt uns gemöscht und mit uns vermöscht. Alles is scho so selbstverschtändlich, däß mich net wunner tät, wenn der Niklaus anschtatt off e Esele - mit e Trabile kümmt - und na tät jo wallich e Bischof dinn hock - und na müsse mer widder wink - odder - bos männt denn Ihr dozu – Euer Cilli