Eustach & Gotthold
Ee Jubiläum joocht s anner. Neulich „150 Jahre Schlager“ (ihr derinnert Euch?), jetzt „70 Jahre Main-Post“. So konnt mersch neulich les und a Riesen-Beilage in die Zeitung hodd doss Jubiläum gebührend gfeiert. 70 Johr a Zeitung mach – woss doss Nerve gekosst hobb muss! Beneid tu ich die Redagdööre unn freie Mitarbeiter wallich nedd, denn für die Zeitung zu schreiwe, iss scho nedd eefoch. Jeder guggt genau, ob alles basst und wehe, es iss amoll woss falsch üüwer woss gschriewe, wo merr sellwer dabei woor. Sofort würrd sich beschwert unn unverzüglich Korrektur gfordert. „So ist?s richtig“ städd no ömmer üüwern Artikel, zu den sich die jeweilich Redaktion genötigt fühlt. Alles passiert jo nedd in böser Absicht. Die Texte und Überschrifte entstenn oft unter Zeitdruck und doo rötscht halt emoll woss durch! Missverständliche Überschrifte zum Beispiel.