Glosse: Corona on kee End

Es is eefoch nix mer so wies e moal wor. Alles is im vergangene Johr in e Durchenanner geroate. Wann de nämlich owends nei dei Bett steichst, weißte net, wie die Welt bis zum annere Früh sich verännerd hat. Wann du noch für e Johr dein Frühstücksweck ganz locker mit selber eigemochter Erdbeermarmelad bestriche hast, langst du jetzt als erschtes mit zidderiche Händ nooch die Zeitung on süchst gierich off die erscht Seite die neüeste Inzidenzwerte. Ja, gedds noch?

Triffst du dann wirklich off die Straß im Laufe des Doochs en Bekannte, is die erscht Frooch: „Haste dein Impftermin scho?“ „Nee, no net." „Lauter Lahmörsch.“ „Haste racht.“

Die nächst Begechnung im Bäckerlode: „Hastes scho mitgricht?“ „Nee, wosn?“ „Bei die Schwarze hömm se scho widdr e poor Maskeschiewer derwöscht." „Lauder Gauner on Bandide.“ „Haste racht.“

E bisle komisch isses ower scho, dass die Grünne, Roete on aach die Oranschene gor net so e gross Palaver do draus mache. Hömm vielleicht aach e weng Angst, es könnte sich do aach e poor „schwarze“ Schoff verkroche hoo?

Off en Hemmwaach dann doch noch e vernünftich Gespräch quer üwer die Straß: „Hastes mitgricht?“ „Nee wosn.“ „ Dr Bundes-Jogi schmeißt im Sommer den Beddel hie.“ „Geh zu.“ „ On dr Loddar soll sein Noochfolcher wern.“ „Wer kömmd dann off so e Idee?“ „Där Beckenbauer haddn fürgeschlooche.“ „Hat där jetz aach scho en Hirnriss odr is mit Astrazeneca geimpft?“

Ehrlich, ich konn mersch net fürstell. Wu doch där Uli dem Loddar net e moal die Ärwet vo en Greenkeeper zutraut. Ower kee Angst, bis zum Sommer gidds dann noch vill Ärwedsloese, die Bundestrainer könne. Dr Jens Spahn odr aach dr Altmeier Peter beispielshalwer. Vo Fußball mösse die koi Ahnung hoo, von ührn jeztiche Tschob hömm se jo aach net vill.

Eichentlich fröö ich mich ower scho off die Zeit nooch Corona. Dann kömmd dr Aufschwung widdr. Die Krankehäuser komme net nooch, alle Schlapp- on Sechelohrn widdr zu richte, wann die hinner die Maske widdr zum Fürschein komme. Do vergenn widdr e poor Johr.

Wann ich dann widdr mein Bekannte treff, is gleich die erscht Frooch: „ Ohrn scho widder ogelecht?“. „Nee, noch net.“ „ Lauter Lahmörsch.“ „Haste racht.“

Ned auszudenke!