Mit mei erschd Glosse heüer im Januar hadd ich mich getraut e weng Hellseher zu spille on hadd e poor Fürschläch fürs Johr gemocht. Richdich, dr Charles is koi Könich on dr Jogi Löw net zum Welttrainer gewählt worn. On däss aüs dem Brexit heüer nix werd, hoo ich aach scho im May gewüsst.
Die Helene Fischer hadd ich für des Dschungelcämb off menn Zetel, do draus is nix worn, do defür musst dr Silbereisen off es Traumschiff, wos eichentlich es selbe is. Schod, däss dr Ribery net Schatzmeister vo die Bayern worn is. E Goldsteek im Tresor, des wärsch doch. Jetz muess där orm Kerl in Italien Schbagetti büchel. Aach so enner werd e moal e weng bescheiden.
Dr next Merz kömmd ganz bestimmt
Die ogekündicht Kanzlerdoppelspitze vo die AKK on dem Merz wär scho e Sensatio gewaast, ower wär rechert scho mit so vill Hartnäckichkeit vo die Angela. Die Annegret sölld sich net zu früh fröh, dr next Merz kömmd ganz bestimmt. Die Sozi! Ja verreck, die Roete! 17 Kandidate hömm se gebraucht, ömm zwee Infantriste vorn no ührn Murxverein zu stelle. Glückwunsch.
Där Begriff Groko stett bei däre zwee für Großkotz. Übrich gebliebe vo däre ihr „Getöns“ is es Tempolimit. Sagenhaft. Zegor dr Andi Scheuer lachd sich schlapp. Zum Werbefilm für die Sozi is des Streifle „Kevin-allein zu Haus“ gewählt worn, wäll des Filmle stark o des Sozidurchenanner erinnert on wu do debei so e Rotzlöffel mit Nome Kevin des Haus dehemm vor zwee Einbrecher schütz muess. NoWaBo on Saskia. Ich grich mich nix mer.
Mei Gebaadlich zum heiliche Antonius hömm doch geholfe
Dass dr Ömbau vo die Tiefgarasch in Neüscht zomm mit dem Berliner Fluchplatz fertich werd, halt ich nooch wie vor für e Gerüccht on dass die Luftnummer mid däre Seilbahn widdr härgezauberd werd, hatt zegor mich total überrascht.
Dass die Glosfabrik off den Kreüzberch net gebaut werd, hadd mich dodegeche gor net gewunnerd. Neüeste Ankündichunge nooch komme die guete alte Tonkrüüch widdr zum Einsatz. Ich bin begeistert. Spitze, die neü Führung do dowe off onnern heiliche Berch. Mei ville Kerze on mei Gebaadlich zum heiliche Antonius hömm doch geholfe.
No also, so schlachd gelaache wor ich gor net am Johresanfang. Dr MaZI is rachd stolz off sich. Wurscht. Enns garantier ich, heüt Nocht Punkt zwöllef Uhr is es alt Johr römm on es neü fängt o. Kommd all guet nei odr nüü odr so. Auf jeden Fall: Prost Neujohr.