Es hässd jo allerweil oft: „Die Welt ist aus den Fugen geraten.“ Mooch jo gsei. Owwer wenn die Welt vielleicht nedd aus die Fuuge geroode iss, durchenanner isse allemol!
Woss woor doss früher, so in die siebziger Johrn, doch – zumindest für n Moo - ein wie in Stee gemeißelter Ablauf. Der Sonndich zum Beispiel. Ömmer n halwer zeeh früh woor Kirch, dann Frühschobbe, Middochesse, Kannebee (dr Frühschobbe!), Fußball, dann widder Wirtschoffd– unn doss woorsch ...
Weißer Sonndich woor allemaladdich ömmer gleich n Sonndich nooch Össder. Die Fronleichnamsprozession woor ömmer offn Dooch unn zwor gleich nooch die Kirch. Die Fußball-Bundesliga hodd nur n Samsdich gespielt unn alle Spiele worrn gleichzeitig n halwer vier. Ömmer!
Aus unn vorbei! Ein Durchenanner heutzudooch! Unn Corona hodd doss natürlich noch beschleunigt. Kommunion unn Konfirmation n September unn Oktober, Fußball-Bundesliga vo Freidich bis Monndich, Kirch fast wie die Bundesliga üwers ganz Wochenend verdääld, Fronleichnamprozession amol n Durschdich, n Samsdich, n Sonndichfrüh odder n Sonndichowerds. Wer söll denn doo noch durchbligg, n Halt finn unn sich oo irchendwoss orientier könn?
Es hört sich vielleicht horrd oo, owwer wenn mer doss alles so hört, muss mer als Moo jo fast froh sei, däss mer im Schnitt fönnef Johr weniger labbt wie a Fraa! Hodd natürlich n Grund, worömm ich jetzt off die Daadsach komm. Ich hobb neulich geleese, däss Männer zwoor tatsächlich im Schnitt fönnef Johr kürzer leebe wie Frauen, sich doss owwer ausgleicht, weil Frauen dofür in ihr Laabe fönnef Johr vuur Kloos in a Schlange stehn.
Bautsch! Isses wallich so? Do brauchste nedd vill dezu! Wenn mer die ganz Zeit amoll zommzählt, die leidgeprüfte Frauen vuur n Obtritt in a Schlange stenn, könnte wallich fönnef Johr zomm gekomm!
No ja. S senn eefoch vergleichsweis schwerre unn ernste Zeite, in denne mir allerweil leebe. Desweeche well ich zum Schluss unner Rhön-Grabfelder Seel middn Spruch streichel, den ich neulich geleese hobb unn den ich zu schöö unn treffend finn. Gsochd hoddn der Oberstleutnant Thomas bei die Auflösungszeremonie voss Panzerbataillon 355 inn Wildflegge. Der Spruch laut – macht euch gfasst: „Das Herz eines Rhöners ist nicht leicht zu öffnen. Aber es ist eine Festhalle, wenn man drinnen ist.“ Schöö, odder?
Servus, der Eustach.
