Heut‘ geht’s amol über woss, über doss mer normalerweis nedd red (drömm schreib‘ ich drüü …..): s Geld. Allee, wenn merr sidd, wie viel Ausdrück es für Geld bei uns in Deutschland gidd, merkt mer, wie uns doss Thema bewegt: Kohle, Kröten, Mäuse, Moos, Zaster, Piepen, Marie, Mammon, Moneten und und und.
Unn Geld hodd jo a vill mit Gfühle zu dunn. Es dudd zum Beispiel eefoch ömmer widder weh, wenn mer grössere Beträg in bar bezohl muss unn zugugg muss, wie s sauer verdient Geld vo die ääche Haand nei a annere wechselt.
Eine Barbezahlung ist schmerzhafter als eine Überweisung
Beim Tanke zum Beispiel. Einmal volltanken, 60 Liter Diesel: 110 Euro! Wenn mer per Korrde bezohlt, iss es Geld zwoor genauso furrt, owwer mer merkts nedd so unmittelboor, direkt unn schmerzhaft wie bei Barzahlung. So gedd‘s mir zumindest.
Römmgedreht genauso. Wenn dir jemand n Bedrooch überweist, isses offs Konto. Alles gut. Owwer mehrere (größere) Scheine direkt in die Händ zu grieche, unn dann eizustegge, iss halt doch a woss annersch!
Woss worrn doss noch für Zeite, wie die Löhn unn Gehälter in bar ausbezohlt wurrn senn. Lohntütenball! Hieß: gleich, nochdem die Männer in die Fabrigge bei‘n Preh odder bei die Siemens ihr Lohntüte midds Geld vo die Saalschreiberin gricht hadde, senn se nooch Feierowerts nei die erstbest Wirrdschoffd unn hömm gfeiert! Wenn nedd die Fraa in weiser Voraussicht scho oos Werkstor gstanne woor, unn ihrn Göttergatte mitsamt sei Geld direkt dürrt obbgholt hodd.
Genial: Steuern und Sozialabgaben werden vom Lohn direkt einbehalten
Aa s System, däss die Steuern unn Sozialabgaben direkt vom Lohn eibehalte werrn, iss ein genialer Schachzug seiner Erfinder! Stell dir mo vüür, du griechest alles in bar raus, müsst‘ dann owwer jedes Mooned 600 Euro Lohnsteuer nei s Finanzamt, 400 Euro für Kranke-/Pflegeversicherung zu die AOK, 55 Euro für die Arbeitsloseversicherung nei die Arbeitsagentur unn 50 Eure Kirchesteuer zunn Pforr drooch. Unn noch dezu 380 Euro Renteversicherungsbeidrooch in a Briefkuvert nooch Berlin schegg. Doss dääd fei richtig weh!!!
Ja, es stimmt scho, nur Bares ist Wahres! Würrd sowieso ball vorbeisenn mit unner Bargeld. Siehe Filialschließungen unn Abbau vo Geldautomate vo die Banken. Scho raffiniert, wie die doss mache: Erscht würrd ee Filiale nooch die anner gschlosse, däss die Leut alles dehemm online mache. Dann sooche die Banke, däss noch mehr Filiale gschlosse wer müsse, weil keener merr künnt. Servus, der Eustach.