Es Johr 22 gedd so langsam in die letzt Runde. Wie där Schäuble Wolfi die poor Dooch im Bundestooch sei Red zu seim Jubiläum ghalle hat, is mir sei berühmtes Zitat widdr in Erinnerung komme: „Isch over“. Obs e guetes Johr wor odr ned so guetes, des muss am End jeder mit sich selwer aüsmach.
Mir kömmt so e Johr ömmer widdr für wie e Karussell, es dreäht sich manchmoal langsam, manchmoal gedds e weng schneller, ower es dreäht sich ömmer fürwärts on im Kreis. On dann machts en Stopp. Es Johr gedd seim End entgeche on mir mösse aüs dem Karussell 22 aüssteich. On ömmsteich in die nächste Fohrt 23. Vom Reitergaul roo on nei ins Feüerwehrauto? Wer weiß des heüt scho.
Am Ende steht der schönste Feiertag des Jahres
Schöe, dass mit dem End vo däre Karussellfohrt der schönnst Feiertooch vom Johr stett. Weihnochte. Mit meinen Lieblings-Weihnachtsliedle, des ich als Schönaaer Nikolaus so ville Johr mit so ville Kinner in die Wohnstube gesonge hoo, möcht eüch ich zum Johresend o mei Lieblings-Weihnochtsgedichtle erinner, des ons die Pigorsch Cilli aüs Önschlawe (Unsleben) vor ville Johr geschenkt hat on mit dem sie orch ville Leüt in onnerer Rhüe on drü naüs Frööd gemocht hat.
Leise rieselt der Schnee, still und starr ruht der See, weihnachtlich glänzet der Wald, freue dich, Christkind kommt bald. Kerzlich, Herzlich, Öpfelich, Marzipanadöpfelich, Nüsslich, Niklausstiefelich, Säulich, Wöeschtlich, Griefelilch, Fensterlich mit Schnäeflöcklich, Schoklad-Silwer-Goldglöcklich, Wedelich mit Federlich, Engelich mit Flügelich, Glitzer-Christbaamküchelich, Owen Baam die Vöchelich, dunt die Poppewöchelich, Päcklich, Schläfflich, Gschenklich dinn, Förmlich, Plätzlich süch on finn, Schöchtelich, Christkinnelich. Liedlich,- oh jetz fröö ich mich. In den Herzen wird’s warm, still schweig Kummer und Harm, Sorge des Lebens verhallt, freue dich, Christkind kommt bald. Bald ist heilige Nacht, Chor der Engel erwacht, hört nur, wie lieblich es schallt. Freue dich, Christkind kommt bald.
Ich wünsch euch trotz viller Rückschläch in dem Johr e frohes Weihnochstfest. Denkt dro, dass es ons ömmer noch vill vill besser gedd, als so ville Mensche ömm ons römm. Für die neüe Karusellfohrt im Johr 23 vill Glück on e guet Zeit.