Scho orch vill is in däre ledzd Zeit gschriewe on gebabbeld worn üwer des Doping, wos laut em Wörterbuch eichendlich nix annerdes bedeüd wie: „Anwendung verbotener Substanzen zur Leistungssteigerung“. Ich freech mid ernsthofd, woröm in aller Wäld is verbote, wos leistungsförderlich is. Schließlich nömmd jeder Mensch e Schmerzdabledde wann här Zehwäddich (Zahnschmerzen) hadd odr här machd en Fernseh o, wann här gscheid schloff will. Jedr Fosenöchtr lässd sich därezeid die Kudde vool laff, weil här lustich zu senn hadd. Des is doch wohl e Leistung, weil jo ville vo däre Sorte Fosenöchtr es ganz Johr üwr mid e Gsichd römm laffe, däss mer Angst grich könnd. Owr däre Sportler nömmd mersch weg.
Ställd eüch für, die Rodfohner däede dann mid achzich Sache statt mid fuchzich durch die Gechend fohr, könnd mer die Tour de France off verzehn Dooch verkörz. Odr 100 Meter-Lauf. Gscheid gedopt, die wärn scho durchs Ziel, befür där Startr üwerhaubd gschosse hädd. Odr die Stabhochsprengr däede üwr es Stadiondooch höpf statt üwr so laüsich Sechs-Meter-Stange.
Odr bann die Bayern-Sozi e weng wos schluck däede, wie schnell die im Herwesd bei die Landdoochswohl off 30 Prozent marschier könnde. Odr onner Landroat. Där könnd in Flodinge e Wohlversammlung ghall on gleichzeidich mid die Bawett vo die Häfnerschgass bei die Neüschdr Fosenocht en Promikochwettbewerb gemach.
Wie ich ghörd hob, däss där Höneß bei die Bayern den Grinsi-Klinsi verpflichd hadd, konnd ich mir ned fürgschdell, däss dos mid rachde Denger zugange is. Mei erschdeer Verdochd: „Doping“. Ower dann hoo ich mir die Pressekonferenz ogeguckd on sofort gsenn: „Nix Doping“. Där Höneß, des Cleverle, lässd laut Vertrooch jeden Früh e LKW-Lodung Klinsmann-Wecklich breng on mid Nörnbercher Höneß-Wärschtla garniert griche des dann sei Stars als Kraftfueddr. On desweche hadd där für däre Verpflichtung en ganze Kartong Kreide gfresse. On die stett bis jetzt ned off däre Liste verbotener Substanzen.
Ned auszudenke.